Պատմություն

Երևանի Սայաթ-Նովայի անվան երաժշտական դպրոցը Հայաստանի երաժշտական կրթության բազմամյա ավանդույթներ ունեցող հաստատություններից է։ Դպրոցի պատմությունը սկսվել է 1934 թվականին՝ փոքրիկ երաժշտական ստուդիայից, որը տարիների ընթացքում վերածվել է հարյուրավոր աշակերտների, ճանաչված մանկավարժների և երաժիշտների կրթօջախի։

1934 թվականի սեպտեմբերի 1-ին Լուսաշխի տանը իր աշխատանքը սկսեց լուսավորության աշխատողների երեխաների համար ստեղծված երաժշտական ստուդիան, որի նախաձեռնողն ու կազմակերպիչն էր երաժշտական կրթության եռանդուն գործիչ Վարդուհի Զաքարյանը։ Առաջին ուսումնական տարում ստուդիա ընդունվեց մոտ 50 երեխա։

1936 թվականին սովորողների թիվը հասավ 80-ի, իսկ ուսուցչական կազմը համալրվեց նոր մասնագետներով։ 1939 թվականին ստուդիայում արդեն սովորում էր շուրջ 200 երեխա։

1940 թվականին երաժշտական ստուդիան վերածվեց յոթնամյա № 2 մանկական երաժշտական դպրոցի։ Դպրոցի տնօրեն նշանակվեց Վարդուհի Զաքարյանը, իսկ ուսումնական մասի վարիչ՝ Ելենա Մադաթյանը։

1941 թվականին դպրոցը տվեց իր առաջին ինը շրջանավարտներին։

1945 թվականը դարձավ դպրոցի պատմության կարևորագույն հանգրվաններից մեկը։ Սայաթ-Նովայի մահվան 150-րդ տարելիցի կապակցությամբ դպրոցը վերանվանվեց մեծ աշուղի անունով։

1948 թվականին դպրոցում բացվեց փողային բաժինը՝ շեփորի, վալտորնայի և կլարնետի դասարաններով։

1949 թվականին բացվեց դպրոցի մասնաճյուղը, որը հետագայում դարձավ Արմեն Տիգրանյանի անվան երաժշտական դպրոցը։

1955 թվականին սկսվեց դպրոցի նոր շենքի կառուցումը։ 1959 թվականի սեպտեմբերի 1-ին դպրոցը նոր ուսումնական տարին սկսեց արդեն նոր շենքում։

1960-ականներից դպրոցի տնօրեն, բազմավաստակ մանկավարժ-ջութակահար Պետրոս Հայկազյանի շնորհիվ դպրոցը դարձավ հանրապետության երաժշտական կրթության հեղինակավոր կենտրոններից մեկը։ Դպրոցի սաներն ու մանկավարժները ակտիվորեն մասնակցում էին համերգների, մրցույթների և հանրապետական ստուգատեսների։

Դպրոցը ստեղծագործական կապեր հաստատեց Թբիլիսիի, Կիևի և Մոսկվայի երաժշտական դպրոցների հետ՝ իրականացնելով փոխադարձ այցելություններ, համերգներ և մասնագիտական փորձի փոխանակում։

Դպրոցի շրջանավարտներից շատերը հետագայում դարձան անվանի երաժիշտներ, մանկավարժներ, նվագախմբերի արտիստներ։

Դպրոցի անվանի շրջանավարտների թվում են Էմին Արիստակեսյանը, Ռուբեն Սարգսյանը, Վարդան Աճեմյանը, Յուրի Դավթյանը, Էդուարդ Թոփչյանը, Տիգրան Հեքեքյանը, Մարգարիտա Ռուխկյանը, Ծովինար Մովսիսյանը, Լիլիթ Եփրեմյանը, Սվետլանա Նավասարդյանը, Սերգեյ Բաբայանը, Կարինե Օհանյանը, Հասմիկ Պապյանը, Ռաիսա Մկրտչյանը, Էլվինա Մակարյանը, Ռուբեն Մաթևոսյանը, Նարեկ Հախնազարյանը և բազմաթիվ այլ երաժիշտներ ու մշակույթի գործիչներ։