Համագործակցություն

2026 թվականի հոկտեմբերի 8-ին Երևանի Սայաթ-Նովայի անվան և Գերմանիայի Լայպցիգ քաղաքի Յոհան Սեբաստիան Բախի անվան երաժշտական դպրոցների միջև ստորագրվեց համագործակցության հուշագիր՝ հիմք դնելով երկու կրթօջախների միջև երկարաժամկետ մասնագիտական և ստեղծագործական գործընկերությանը։

Երևանի և Լայպցիգի միջև ձևավորված գործընկերության ծրագրերում հատուկ ուշադրության է արժանացել մշակութային կրթության ոլորտը, որի շրջանակներում իրականացված առաջին քայլը Հայաստանի և Գերմանիայի երաժշտական կրթության առաջատար հաստատությունների միջև Հուշագրի ստորագրումն էր։

Հուշագիրը նոր հնարավորություններ է ստեղծում երկու կրթօջախների միջև մասնագիտական փորձի փոխանակման, համատեղ կրթական և ստեղծագործական ծրագրերի իրականացման, ինչպես նաև սովորողների և դասավանդողների փոխադարձ այցելությունների համար։

Լայպցիգի Յո. Ս. Բախի անվան երաժշտական դպրոցի տնօրեն Մաթիաս Վիդեմանի գլխավորած պատվիրակությունը այցի շրջանակներում ծանոթացավ Երևանի Սայաթ-Նովայի անվան դպրոցի պատմությանը, կրթական միջավայրին և գործունեությանը, իսկ հուշագրի ստորագրմանը հաջորդեց դպրոցի սաների մասնակցությամբ համերգային ծրագիրը։

Այս համագործակցությունը ևս մեկ կարևոր քայլ է Երևանի Սայաթ-Նովայի անվան երաժշտական դպրոցի միջազգային կապերի ընդլայնման և երիտասարդ երաժիշտների համար զարգացման նոր հնարավորությունների ստեղծման ուղղությամբ։

Ուզբեկստանի Հանրապետության մշակույթի նախարարության հրավերով Երևանի Կոմիտասի անվան պետական կոնսերվատորիայի պրոռեկտոր Ռուզաննա Ստեփանյանը և Սայաթ-Նովայի անվան երաժշտական դպրոցի տնօրեն Գարիկ Նազարյանը մասնակցեցին Տաշքենդում անցկացված «Երաժշտական կրթություն․ դեպի միասնական տարածություն՝ համաշխարհային մասշտաբով» միջազգային ֆորումին։

Պատվիրակությունն այցելեց Ուզբեկստանի պետական կոնսերվատորիա և Տաշքենդի Վ. Ուսպենսկու անվան մասնագիտացված երաժշտական դպրոց, մասնակցեց մասնագիտական քննարկումների և հանդիպումների՝ միջազգային երաժշտական կառույցների ներկայացուցիչների հետ։

Սայաթ-Նովայի անվան երաժշտական դպրոցի կամերային նվագախումբը՝ ղեկավար Արման Գրիգորյանի գլխավորությամբ, Հունաստանի Միտիլինի քաղաքում մասնակցեց Երաժշտական դպրոցների 3-րդ միջազգային հանդիպում-փառատոնին։

Համերգային ծրագրում հնչեցին Վիվալդիի, Կոմիտասի, Միրզոյանի և Հարությունյանի ստեղծագործությունները։ Պատանի երաժիշտները մասնակցեցին նաև վարպետության դասերի, սեմինարների, միջմշակութային երկխոսության ծրագրերի և մշակութային-ճանաչողական այցերի։

Դպրոցը շնորհակալություն է հայտնում Երևանի քաղաքապետարանին՝ կամերային նվագախմբի առաջին արտասահմանյան ուղևորությանն աջակցելու համար։

Սայաթ-Նովայի անվան երաժշտական դպրոցը հյուրընկալեց Լայպցիգի փոխքաղաքապետ տիկին Սկադե Յենիկեի գլխավորած պատվիրակությանը։ Հյուրերը ծանոթացան դպրոցի պատմությանը և ներկա գտնվեցին հատուկ կազմակերպված համերգային ծրագրին՝ գերազանցության ծրագրի շահառուների և «Շողեր» երգչախմբի մասնակցությամբ, Նաիրի Գրեյս-Բարդակչյանի ղեկավարությամբ։

Այցը հիմք դրեց մշակութային կրթության ոլորտում նոր կապերի ձևավորմանը։ Նախատեսվում է Սայաթ-Նովայի և Լայպցիգի Յոհան Սեբաստիան Բախի անվան երաժշտական դպրոցների համատեղ նախաձեռնությունների ու ծրագրերի իրականացում։